header image
 

Estánse xa a traballar as terras da comunidade de bens, nos terreos nos que se prevé a ampliación da piscifactoría

Os traballos de campo do curso de agricultura ecolóxica comezaron o martes. A parcela que se traballa está incluída na área onde se pretende construir a ampliación da piscifactoría e forma parte da comunidade de bens creada entre os veciños.Plantouse un horto con productos propios na agricultura tradicional galega (leitugas, fabas, tomates e repolos).

Na súa páxina de novas Adega di o seguinte acerca deste paso: “Con esta iniciativa, os veciños de Quilmas desafían a pretenciosa visión das grandes explotacións piscícolas como única e exclusiva opción de desenvolvemento das pequenas localidades costeiras, argumento que cae polo seu propio peso en canto os proxectos acuícolas conseguen asentarse nas ditas localidades (…): Nunca se xeran os postos de emprego prometidos, os conflictos laborais aumentan cada vez máis, non é certo que non contaminen e, para colmo, arruinan unha das maiores potencialidades económicas e sociais das paraxes privilexiadas onde se instalan, o turismo común ou natural, por non falar xa da destrución directa e irreversíbel do conxunto ecolóxico, que pasa a estar cuberto por inmensas extensións de formigón e instalacións industriais.”

http://quepasanacosta.com/, http://adega.info/.

Comezou o curso de agricultura ecolóxica organizado pola cooperativa de explotación comunitaria da terra “Raíña Lupa” de Quilmas

Despois do primeiro curso de compostaxe caseiro, impartido no local da Plataforma, o luns 23 de Xuño comezou o curso de agricultura ecolóxica, que foi un dos primeiros concedidos pola Consellaría do Medio Rural. A primeira clase correu a cargo da profesora Lucía Ferreiro Fernández, enxeñeira agrícola. O martes 24 tratouse o tema da loita biolóxica contra as plagas e enfermedades. O próximo luns 30 comezarán as prácticas de horta nos terreos veciñais.
http://quepasanacosta.com/.

O Diputado Bieito Lobeira presenta no Parlamento unha pregunta sobre a política laboral da Stolt Sea Farm

Lobeira quere saber qué axudas públicas recibiu a compañía desde o ano 2000 ata hoxe e a especificación das cantidades percibidas, e pregunta qué medidas ten previsto adoptar o Executivo galego «en defensa do principio de xeración de traballo digno» (un dos requisitos nos que se fundamenta a concesión das axudas), nos centros de traballo da empresa.

Na súa exposición de motivos, explica que a Stolt «está a practicar unha política laboral agresiva contra o seu cadro de traballadores. Nos últimos tempos foron despedidos vinte (…) e existen denuncias por acoso laboral, ademais de perda de poder adquisitivo, con salarios conxelados dende ou ano 2006».

“É paradóxico”, di, “que unha empresa que recibe cuantiosos fondos públicos, xestionados dende a Consellería de Pesca, para desenvolver a súa actividade, manteña unha política laboral como a descrita, que mesmo contraría os principios, coma o de xeración de emprego digno, que fundamentan a súa concesión».
http://www.lavozdegalicia.es/.

Concentración espontánea ante as dependencias da Xunta

Uns 150 veciños das Plataformas en Defensa do Litoral de Merexo, Camelle, Corrubedo e Quilmas concentraronse onte con pancartas nas inmediacións da Xunta, coincidindo coa manifestación convocada polos sindicatos en contra da privatización e dos “chiringuitos” da Administración.

Malia que os dous grupos pediron ser escoitados, Tourinho só falou cos funcionarios.
http://www.elpais.com/.

Rexeitada unha proposta do PP para eliminar do Plano Acuícola a Merexo

A Comisión de Pesca do Parlamento de Galiza rexeitou onte, cos votos do PSOE e o BNG, unha proposta do PP para eliminar do Plano Acuícola o polígono de Merexo.

O portavoz popular de Asuntos Marítimos, José Manuel Balseiro, dixo que a reserva de 270.000 metros cuadrados nesta localidade para ampliar a piscifactoría da Stolt Sea Farm é “un total desatino que hipotecará o futuro do pobo de Merexo e colisiona coa necesidade de garantir a correcta protección dunha paraxe de grande interese medioambiental”, e lamentou que os socialistas e nacionalistas non respetasen a “alta” oposición dos veciños do pobo.

Tamén dixo que o proxecto de ampliación carece dun estudio de impacto ambiental riguroso e dunha valoración adecuada do dano que o plano ocasionará no ecosistema, e que os nacionalistas tiñan un “doble discurso”, “apoiando aos que reclaman a supresión do polígono de Merexo” e “impedindo que iso se leve a cabo”.

A Consellería de Pesca reafirmou a súa intención de sacar adiante o plano porque o avalan todos os informes preceptivos.

Un grupo de veciños seguiu o debate dende o Parlamento.
http://www.elcorreogallego.es/, http://www.xornalgalicia.es/, http://www.anosacosta.es.

A cuestión volveu a sair nunha reunión que os presidentes e voceiros do PP dos concellos de Corcubión, Carnota, Fisterra, Cee, Dumbría, Muxía, Camariñas, Vimianzo e Zas, mantiveron pola tarde cos estamentos provinciais do partido.
http://quepasanacosta.com/.

A documentación remitida polo Valedor evidencia que a Consellaría de Pesca informou a esta institución de que a Plataforma de Merexo non presentara alegacións ao Plano Acuícola

Sen embargo, a primeiros de Maio o Tribunal Superior de Galicia admitiu a trámite o recurso contencioso administrativo presentado pola Plataforma de Merexo sobre a resposta dada pola Consellaría ás súas alegacións.
http://quilmas.wordpress.com/2008/05/09/.

Noutro informe, a Consellaría de Medio Ambiente indica ao Valedor que “con relación á granxa mariña de Merexo non existe constancia nesta Dirección Xeral que se teña iniciado ningún prodecemento de ampliación”, ainda que dita ampliación é de dominio público desde que se expuxo o Plano.

A Plataforma Veciñal de Merexo fixo pública unha nota de prensa e pensa incluir esta documentación nun informe que esta a elaborar a súa asesoría xurídica. http://quepasanacosta.com/.

Novo vertido de materia orgánica na praia de Corna Becerra

Onte as nove da noite a zona do desaugue da piscifactoría estaba chea de graxa de penso. A Plataforma denunciou de novo o feito perante Augas de Galiza hoxe.

Ainda non se sabe nada da denuncia feita o 3 de Marzo.http://quilmas.wordpress.com/2008/04/30/.

A Stolt ven de solicitar a Augas de Galiza o permiso de vertido para as piscifactorías de Quilmas e de Lira, 20 anos despois da súa instalación.http://quilmas.wordpress.com/2008/06/01/.
http://quepasanacosta.com/.

As alegacións de Adega ao permiso de vertido da Stolt poden lerse nesta páxina.

A Plataforma de Quilmas organizará unha actividade de compostaxe caseira e un curso de agricultura ecolóxica en Xuño; en Agosto haberá unha exposición fotográfica nos terreos previstos para a ampliación da piscifactoría

A Plataforma pola defensa do patrimonio cultural de Quilmas participou o pasado sábado 7 nas “V Xornadas Limpando as nosas rías” en Fisterra, organizadas pola Asociación de Armadores de Artes Menores de Galicia (Asoar-Armega). As xornadas pretenden limpar as rías galegas e concienciar da necesidade de coidar o entorno mariño. Quilmas tamén estivo presente nas xornadas de limpeza e concienciación de Corcubión.

Pola súa parte, a Plataforma de Quilmas ten varias actividades planeadas para xuño e agosto:

- O vindeiro 12 de xuño ás 17:00, o local da asociación acollerá unha actividade teórico-práctica de compostaxe caseira. A actividade está organizada por Adega-Costa da Morte.

- Outra iniciativa da Plataforma, a Cooperativa de Explotación Comunitaria da Terra Raíña Lupa, está a organizar un curso de agricultura ecolóxica que se impartirá a finais deste mes de xuño. A inscrición está aberta a toda a bisbarra. Para máis información pódese chamar ao 687 531 513.

- Os vindeiros 1, 2 e 3 de Agosto organizarase unha exposición fotográfica na zona onde se ten previsto instalar a piscifactoría e onde foi rodado o telefilme A mariñeira de Quilmas. Unha das casetas encherase de fotografías antigas e proxectarase a película.

A comunidade de Bens xa está case organizada e todas as terras encadradas na área da ampliación da piscifactoría xa están postas en común para comezar a traballalas.

http://quepasanacosta.com/.

A Plataforma de Merexo participa na campaña “Fotodenuncia” de Greenpeace

Presenta unha foto dos terreos onde se ampliará a actual piscifactoria para o engorde de rodaballo, fronte ao mar, dentro da ría de Camariñas e Muxía.

Na zona atopáronse restos arqueolóxicos dunha antiga fortaleza militar de 1801.
http://quepasanacosta.com/, http://fotodenuncia.greenpeace.es/.

Representantes de 14 organizacións sociais concentraronse onte en Compostela contra as ameazas que sofren o litoral e a costa de Galiza

O secretario executivo de Adega, Fins Eirexas, esixiu a inmediata retirada do Plano Acuícola.

A concentración coincidía co remate da Semana Galega do Medio Ambiente e a celebración, o pasado día 5, do Día Mundial do Medio Ambiente, dedicado este ano a “sensibilizar sobre o abandono do carbón para frear o cambio climático”. Nesta liña, Eirexas lamentou que en Galicia se localicen “as dúas centrais térmicas de carbón máis contaminantes de España, Meirama e As Pontes” e que a comunidade “estea á cabeza de toda Europa en emisións de dióxido de carbono por habitante”. “Estamos a soportar estes impactos sen compensación nin beneficio”, dixo, “… e os estados teñen que obrigar as empresas a que vaian substituindo o carbón por enerxías alternativas”.

Con respecto ao Plano Acuícola Eirexas dixo que “non se pode pensar que a pesca en terra é a solución para ter un sector pesqueiro vital; as nosas rías poden producir máis se as limpamos e evitamos os impactos. A solución é mirar máis pola nosa ría e menos polos peixes de cemento que programa a Xunta”. “Está claro polo que hai que apostar, pero se a Xunta quere apostar por outra cousa, vainos atopar en fronte de cada localización de cada xigantesca granxa da morte, que é o que son as piscifactorías”, advirtiu. “Por 1.800 postos de traballo” non se poden “contaminar e ocupar tres millóns de metros cadrados de costa virxe”, concluiu.

A lectura do manifesto correu a cargo de Xurxo Souto e rematou entre cánticos de “Galiza non se vende” e “Pesca de baixura e non de acuicultura” por parte dos colectivos concentrados: Adega, Amigos da Terra, e as asociacións en defensa do litoral de Merexo, Camelle, A Xandriña, Seiruga e Quilmas, entre outros.http://www.galicia-hoxe.com/, http://www.elpais.com/, http://www.lavozdegalicia.es/.

Mentres se celebraba o acto, unhas 3000 persoas manifestábanse en Ferrol contra Reganosa noutra manifestación convocada polo Comité Cidadán de Emerxencia para a Ría de Ferrol.http://www.vieiros.com/.